مجرد تخاريف

محمد الرفاعي

نشر: 13/4/2013 3:05 ص – تحديث 13/4/2013 9:28 ص

■ إذا كانت هيبة الرئيس -أىّ رئيس- تسقط بمقالة، أو نكتة، أو برنامج، تبقى لا مؤاخذة خيبة.. مش هيبة.

■ فى خطابه الأسبوعى فى قصر الخلافة، أعلن محمد بديع أن المتظاهرين بلطجية، وأن المشايخ هم أصحاب الثورة! فعلًا يا مولانا.. بأمارة ما شفناك كلنا بعينينا اللى هاياكلها الدود، وانت بتُستشهد فى الثورة، وروحك بترفرف لحد دلوقت فى الميدان.

■ الراجل اللى قال إن الست والدته، كانت بتشرب بول أبوه عشان تشوف نسبة السكر، ماقالناش كانت بتشربه فى قزازة، ولا كوز، ولا سايب.

■ بعد تصريح محمد مرسى الشهير، إن اليهود أحفاد القردة والخنازير، قرر مكتب الإرشاد، اعتبار الإخوان شعب الله المختار الوحيد.

■ رئيس الوزراء الحاجّ هشام قنديل، طلع بيلعب سنافر.. طب الحمد لله إنه مابيلعبش عريس وعروسة أو صلّح مع مجلس الوزرا.

■ بمناسبة انقطاع الكهرباء أربع ساعات يوميًّا عن مطار القاهرة، وكل محافظات مصر.. نهدى إلى محمد مرسى أغنية «كفاية نورك علَيَّا».

■ بعداتهام باسم يوسف بإهانة باكستان، لأنه لبس طاقية شكل الحلة البريستو، قررت الأمم المتحدة اتهام الإخوان بإهانة طائفة البهرة، لأنهم بيربُّوا دقنهم.

■ غضب البعض من حضور أبو إسماعيل اجتماع الإعلاميين مع الوزير الشيخ، لوضع ميثاق إعلامى مع أنه كفّر الإعلاميين وحاصر مدينة الإنتاج.. الحقيقة أنه حضر بصفته أكبر مورد للجمال للمعتصمين.

■ طالب الإخوان المسلمون بإقالة شيخ الأزهر بعد تسمم أكثر من خمسمئة طالب، لأن فضيلته ماعرفش ينقى الرز.

■ قرر مكتب الإرشاد منع الإخوة والأخوات من التعامل مع صوابع المحشى، بخاصة بعد خطاب الرئيس الأخير.

■ يسخر الناس من حكاية تعيين محمد البلتاجى رئيسًا للمخابرات العامة، على اعتبار أن إيه علاقة المناخير والودان والزور بالمخابرات؟ طب وإيه علاقة محمد مرسى بالرئاسة؟!

■ زمان كان عندنا المطرب الشعبى أبو دراع.. دلوقت عندنا الرئيس أبو صباع.

■ أخيرًا.. وعلى رأى الشاعر النحرير.. اللى بيبع جبنة وسيمط فى التحرير.. لكل داء دواء يُستطب به.. إلا الحماقة أعيَت من يداويها.