فكم من حاكم أفتى وتاه بكل Direction ـ


بقلم   حنان مفيد فوزى    ١٥/ ٤/ ٢٠١٣

الليلة عيد والعريس بينهض، ومادام العريس بينهض تبقى العروسة هتنهض، عريسنا سجين والعروسة يتيمة، ياللى اخترت الغشيم هتاخد بالجزمة القديمة، لا الخرطوش هينفع ولا الشماريخ، على الآلى دوّر، وسمع هووووووس… أيوه النهضة، اللى عايز النهضة، النهضة المحطة الجاية، حَضّر نفسك بتذاكر ياللى نازل النهضة ومش طالع تانى، الفرح فرحنا من بعد شُوقة واللى مش حابب يشارك.. يفارق، وأخص بالذكر بنو ليبرال وقبيلة علمانو وباقة سلفى شكراً، والله أكبر فوق كيد المعتدى، يا ثوار يا شر كفاية قر، الحلوة دى م الشرقية، صِبر ونال الاتحادية، ويا قلبى خَبّى لا يبان عليا ويشوف رئيسى دموع عينيا..

وسع وسع وسع ياض منك له، ليها.. وصل وصل وصل محمد بك الكبير وكمان مرة محمد بك الكبير، جانا الهوا جانا، حلاوته حلو حلوانى وشغل الحلويات، يا بلح أمهات يا حليوة يا بلح، حبيب هارتى، المعجبانى العِترة، قيما وسيما، ملك وكتابة، حرية وعدالة، نجم جيل الهضبة، بتاع كل المصريين، لا نصهم ولا حتة منهم، يعنى المنتخب بإرادة شعبية بدون تزوير مطابع أميرية، ويا مجايبك يا صناديق، هرم مصر الرابع يا ولاد، أبو سمبل وأمو سمبل كمان، القائد الأعلى للميليشيات المسلحة، يعنى بانوراما أكتوبر، النهر الخالد.. يعنى القناطر الخيرية، راعى الآداب والثقافة والفن النظيف والإعلام الأنظف.. يعنى دار المعارف ذو التوجه الخماسى.. يعنى عم الشباب والرياضة، وسمعنى أعلى صدى صوت رصاص حى لأسد قصر النيل والمناطق المجاورة، اللى صيته مِسمع من موقعة الجمل لموقعة الجبل، واسأل لجان تقصى الحقائق والمحاكم بنت المحروقة عن اللى بيحترم القضا… والقدر، ومن عشمه فيك بيأمر بضبطك وإحضارك لجل ما يطمن على أخبارك، يعنى يطبطب آه، يدلع لا ويا بخت من بَكاه وبَكّى الناس عليه ولا ضَحكه وضَحك الناس عليه، أربعة وواحد خمس ف عينك ياللى ما تسمى على حضرة الوجاهة والأبهة والمفهومية، ابن الأصول والأعراف والقواعد والأهداف، يعنى اللى ماشى زى ما الكتاب بيقول، تبع السمع والطاعة والقصاص.. القصاص.. القصاص، المجدع الرجولة اللى صباعه ما ينزلش الأرض أبداً ولا صوابع فيكى يا مصر تقدر تلعب من وراه عشان كل منطقة وليها دكر إلا بلدنا عندنا دكاترة، يا دكترة أنت يا متأنى يا سيد العرسان، فى الشدة شديد وفى القوة قوى..

أوى أوى، ممكن يفعلها فى أى وقت وسوف يفعلها فى أى مكان، يعنى لا جبهة تهمه ولا دستور يلمّه ويا فلول فلفلوا، ويخرب بيت اللى يزعلوا والبيت اللى جنب بيت اللى يزعلوا، يعنى مالكش عازة ياللى قارف مولانا المعظم.. خديو المحروسة، هتقولى النور بيقطع.. أقولك ده ترشيد للاستهلاك، هتقولى الميه بمجارى.. أقولك اشرب م البحر، تِلتّ وتعجن فى حوارات بسبب عيش وسولار وارتفاع أسعار.. أقولك مالها الفُضل والبواقى، اسكت ساكت واهبط حاطط واقعد لنا على جنب يا نشيط إنت وهوّ، البلد شاطر والدنيا باكينام والجو بديع، قفّلوا على كل المواضيع، إحنا جايين نهدى النفوس عدم اللامؤاخذة، سيبكم من الكلام المدسوس ومبروك عليكم وعلينا، مبروك ياعشيرتنا وأهالينا، البغددة والنغنغة والزهزهة اللى ع الخدود تهفهف وترجع تطير والناس بيلومونا ونعمل إيه يا قلبى، عايزين يحرمونا منه ليه ياقلبى، طيب جرب كده يا شعب يا ناكر للجميل وبيع أرضك، بيع عِرضك وشوف الشارى مين؟ مش برضه إخوانك أولى م القطريين؟ والصلاة ع الزين، الصلاة ع الزين، وسلام مربع طاير حاير لإخوانا حبايب العريس واللى شرفونا ونفضونا، شياطين المقطم، عفاريت الأسفلت المخربشين، الخميرة الحية للبلطجة والضرب بالأقلام للنسوان، يعنى كله ضرب ضرب..

مافيش شتيمة وهى دى أخلاق ابن القرية الذكية، أصل الصياعة أدب مش لعب بالنار، واللى يحبنا ما يضربش نار والغاوى ينقط بطاقيته، يعنى اللى عليه بلحة هيخدها نخلة، واللى عليه نخلة هيخدها فدان وماحدش يرمى النوايا.. الحسنة.. مَرضى كده ياعم الحج، الليلة ليلتك ومعاك النوبتجية حِنة بنت شلبية اللى بتمسى ع الرياسة وتصبح ع الكياسة، وبهذه الزيجة الميمونة اللى مش باين لها خُلع هأفقعك قصيدة شعر والعمر واحد والرب واحد ع بال ما تفرج..

يا ذا العياط لا تحزن فذاك الحكم Infection فى كل مرة تَخطب ناخد لنا كورسInjection فكم مِن حاكم أفتى وتاه بكل Direction

تَعقّل وانسى مُرشدك فقد أخطأت Selection ولا تركع لمن برطع ولا تُبدى له Reaction إن السمع والطاعة لبعض الناس Exception

هتمشى وايّا أمخاخهم وتجيب لنفسك الـTension وتتحالف مع القطرى وتعيد للشيعى Connection

ف عرضك ارجع لأرضك وبلاها هذا الـCorruption

فهل يعقل يا عم الجن تورطنا فى أى Collection

hanan.moufid@gmail.com